Wie de Duiwel is Antie Koekie?

Hoofstuk 1
Wie is Antie Koekie nou eintlik?

Is dit die kort, mollige, amper middeljarige moeder en ouma, soos wat almal haar sien?

Of is sy dalk die vurige, avontuurlustige, stoute, aweregse, sag-geronde, selfs wulpse vrou in haar goue jare?
Die een wat binne-in Antie Koekie se plat en plein dop wegkruip en net uitkom wanneer die maan vol is of as een van slegs ‘n handjie vol uitverkorenes die towerwoorrd sê om haar te voorskyn te laat kom?

Sal die regte Antie Koekie asseblief opstaan…………………..?

Miskien is dit maar floppen goed dat ek in Antie Koekie se plein dop vasgevang is – die Liewe Vader weet ek het in my half eeu+ alreeds genoeg strooi aangejaag vir 5 van my tydgenote!

Maar dit was hengse vet pret en ek besef dat ek eintlik berou moet hê daaroor, maar daarsonder sou my lewe nie so vol en ryk gewees het nie. My”Memoirs” sal eendag ‘n best seller wees, dit belowe ek julle!

Ek is ‘n Baby Boomer, wat oor 5 jaar ouderdomspensioen sal kan kry! ‘n Aarts-romantikus, wat meer as een keer getroud was, en nou agtergekom het dat ek tog met my eie geselskap kan klaarkom, sonder ‘n man om my te laat voel dat ek goed genoeg is om asem te haal.

Nie dat ek nou ‘n mannehater is nie —– alles behalwe! Ek verlang partykeer so erg na ‘n MAN se groot toevou, veilige drukkie; na die mansreuk aan sy vel; die reuk van die eerste rokie as hy sy sigaret opsteek; die gevoel van ‘n effense stoppelbaard teen my wang……………….ag, vrek, ek skryf my nou-nou hier, op ‘n Vrydag middag, in ‘n moerse depro in!

Maar ek wéét mos teen die tyd dat my smaak in mans absoluut “up to maggots” is! Dat ek ‘n wandelende magneet is vir die afbeen SPCA gevalletjies.
En wanneer ek hulle gesond gedokter het met al my liefde, tyd en energie en hulle weer reg voel om die wêreld aan te durf, kyk hulle so diep in my oë en sê:
“Jy is ‘n wonderlike vrou; die beste ding wat ooit met my gebeur het. Ek sal jou nooit vergeet nie, maar dis nou tyd vir my om weer aan te beweeg!”

Shit! En wie dokter dan hierdie dokter? Wie tel dan my stukkies op en plak pleisters op? Want kyk, as ek iets doen, dan DOEN ek dit met volle oorgawe. As ek dus dubbel-K-senter-A aanjaag, dan doen ek dit vir die Eerste Span A!

Gelukkig is ek geseën met ‘n gesonde sin vir humor en ‘n buitengewone sterk ontwikkelde oorlewingsdrang.
Julle ken mos “Peter’s Principle of Success”:

“Getting up one more time than you’re knocked down…..”

(Hou die spasie dop vir “Hoofstuk 2: My kinders”)